मनमोहन अस्पतालय् भ्रष्टाचार

येँ (सन्ध्या टाइम्सि)/फम्पिइ च्वंगु मनमोहन स्मृति सामुदायिक अस्पतालयात एमालेकरण व एनजीओकरण याना यंकूगु द्वपं स्थानीय जनतां बिउगु दु ।

नेकपा(एमाले)या मदुम्ह अध्यक्ष मनमोहन अधिकारीया नामं स्वनातःगु उगु अस्पतालयात सञ्चालक समितिया अध्यक्ष रामकृष्ण महर्जन व वय्कःया पुचलं एमालेकरण याःगु द्वपं स्थानीय जनतां बिउगु खः ।

उकथं हे अस्पतालयात ग्वाहालि कथं थीथी देशं बिउगु दां नं हिनामिना जूगु खँ स्थानीयबासीं धाःगु दु। स्थानीय १५ आना सार्वजनिक जग्गायात व्यवस्थित यानाः २०५९ सालय् नीस्वंगु मनमोहन स्वास्थ्य केन्द्रयात सामुदायिक अस्पतालया रुपय् हे ल्यंका तयेमाःगु स्थानीय जनताया माग दु ।

अस्पताल नीस्वंसांनिसें आःतकया दुने अस्पतालया नामय् वःगु दां, आयव्यय विवरण सार्वजनिक यायेमाःगु माग अस्पताल व्यवस्थापन समितिया पुलांम्ह नायः लबमान महर्जनं यानादीगु दु।वय्कःया कथं आपालं दां भ्रष्टाचार जूगु खनेदुगुलिं निष्पक्ष छानविन यायेत कमिटी नीस्वनेमाःगु, पुस १३ गते दुने साधारण सदस्यता इनेमाःगु, २८ गते दुने न्हूगु साधारण सभा यानाः कार्यसमिति ल्ययेमाःगु माग अन जुयाच्वंगु दु। तर थ्व मागयात बेवास्ता यानाः मनमोहन विकास केन्द्रया नामय् एमालेकरण यायेगु कुतः जूगुलिं अनया माओवादी, नेपाली कांग्रेस व स्वतन्त्र व्यक्तितय्सं खुल्ला विरोध यानाहःगु दु ।

न्यू सेडल कपन नांगु गैरसरकारी संस्थाया निर्देशक चित्रबहादुर के.सीं. अस्पतालया लागिं बेलायत, नर्वे, अष्ट्रेलिया, नेडरल्याण्डपाखें वःगु लखौं दां खर्च हे मक्यँसें थम्हं प्रयोग याःगु खँ अन दुनेया छगू सूत्रं धाःगु दु। नेडरल्याण्ड निवासी मिष्टर कोनं छ्वयाहःगु २० हजार यूरो (२५ लाख ने.रु.) दां के.सीं. दथुइ हे गायब याना बिउगु खँ उखें छ्वयाहःगु इमेलपाखें पुष्टि जूगु खँ नं सूत्रं धाःगु दु।
अस्पतालया निगूगु तल्ला फिनिसिङ यायेत मञ्जुश्री अध्ययन केन्द्रपाखें काःगु ५ लाख तका व स्वंगूगु तल्लाया लागिं नेडरल्याण्डपाखें चित्रबहादुर के.सीं. काःगु ४ लाख ५० हजार तकाया विवरण अस्पतालयात मबिउगु खँ नं पुलांम्ह अध्यक्ष लबमान महर्जनं सन्ध्या टाइम्सयात कनादिल ।

१५ आना सार्वजनिक जग्गाय् शुरु याःगु मनमोहन अस्पताल आः १५ बेडय् विस्तार जूगु दुसा देउसी भैलो म्हिताः वःगु दामं १० आना जग्गा थप यानाः थीथी दातृ निकायपाखें वःगु ग्वाहालिं एम्बुलेन्स नापं चले यानाच्वंगु दु। नापं नर्सिङ क्याम्पस विस्तारया लागिं हाकनं १७ आना जग्गा न्यायेधुंकूगु दु। थज्याःगु अवस्थाय् अस्पताल दुने जुयाच्वंगु भ्रष्टाचार व राजनीतीकरणं थुकिया छबीइ बांमलाःगु लिच्वः लायेफुगु खँ नं सूत्रं धाःगु दु ।