राष्ट्रपतिया ज्या गैरसंवैधानिक

सेनापतियात पदय् बहाल जुइत राष्ट्रपितं ब्यूगु निर्देशन संविधान विपरीत जूगु एमाले सभासदतय्सं निष्कर्ष पिकागु दु ।

सोमवाः सिंहदरवारय् च्वंगु संसदीय दलया बैठकय् अधिकांश सभासदतय्सं राष्ट्रपतिया ज्या गैरसंवैधानिक जूगु बिचाः प्वंकूगु ख: । माओवादी नेतृत्वया सरकारपाखें नं पिहावनीगु निर्णय याःगु एमालेया सभासदतय्सं सेनापति बर्खास्त यायेगु सरकारी निर्णय नं गलत जूगु बिचाः प्वंकूगु खँ सचेतक भीम आचार्यं जानकारी बियादिल ।

थ्वहे दथुइ एमाले नेतृत्वं राष्ट्रपतिया पलाः बारे संविधानविदत नाप सहलह याःगु दु । सहलहलय् संविधानविद टिकाराम भट्टराईं राष्ट्रपतिया पलाः राजनीतिक निर्णय जूगु बिचाः प्वंकादिल । सहलहलय् भट्टराई, शम्भु थापा, चन्द्रकान्त ज्ञवाली लगायतया संविधानविद व अधिवक्तातय्सं ब्वति काःगु खः ।