कांग्रेस दुने हे मेलमिलाप व लोकतान्त्रिक अभ्यास जुइमाःगु : नेता देउवा

नेपाली कांग्रेसं राष्ट्रिय मेलमिलाप लसताय् थनिनिसें स्वलातक जागरण अभियान न्ह्याकूगु दु । देशय् संकट ब्वलंगु क्वःछिउसें थःपिनि कार्यकर्तातय्त प्रशिक्षण बीगु कथं थुगु अभियान न्ह्याकूगु खः । थ्वहे झ्वलय् नेपाली कांग्रेसया वरिष्ठ नेता नापं पुलांम्ह प्रधानमन्त्री शेरवहादुर देउवां पार्टी दुने हे मेलमिलापया नीति व लोकतान्त्रिक अभ्यास जुइमाःगु खँ धयादीगु दु ।

थुगु राष्ट्रिय मेलमिलाप दिवस नापं पार्टीया जनजागरण अभियान अन्तर्गत थौं भरतपुरय् ग्वसाःग्वःगु छगू ज्याझ्वलय् न्ववानादिसें वरिष्ठ नेता देउवां पार्टी छधि छप्पँ जुइमफूसा मेलमिलाप दिवस व जागरण अभियानया तातुनाः पूमवनीगु खँ धयादिल । नापं वय्कलं पार्टीया मदुम्ह नेता गिरिजा प्रसाद कोइराला लिपा पार्टीया भावनात्मक जिम्मेवार थःम्हेसिके वःगु तकं धयादिल ।