एसएलसीया न्ह्यसःपौ नेपालय् हे छापे याइगु
थुगुसिनिसें एसएलसीया न्ह्यसःपौ नेपालय् हे छापे याइगु जूगु दु । उकिया तयारीया लागि थौं हे सरकारी पुचलं सानो थिमिइ च्वंगु प्रेसया निरीक्षण याःगु दु ।
जनक शिक्षा सामाग्री केन्द्रय् दुगु उगु प्रेस निरीक्षण याये न्ह्यः केशरमहलया शिक्षा मन्त्रालयय् शिक्षा मन्त्री सर्वेन्द्रनाथ शुक्लां गृह व रक्षा मन्त्रालयया सचिव नापं नेपाली सेनाया प्रतिनीधित लिसे खँल्हाबँल्हा यानादीगु खः ।
शिक्षा क्षेत्रय् आइरन गेट कथं कयातःगु उगु परीक्षाया न्ह्यसःपौ तयारीया लागि जनक शिक्षा सामाग्री केन्द्रया प्रेसय् ज्या यानाच्वंपिं कर्मचारीतय्त नीन्यान्हु तक पिहां मवःसे ज्या यायेगु कथंया व्यवस्था यायेगु व अनया सुरक्षाया लागि पिनेया सुरक्षा यायेगु नेपाल प्रहरीं व दुनेया सुरक्षा नेपाली सेनायात बीगु व्यवस्था मिले याःगु दु ।
आःतक एसएलसीया न्ह्यसःपौ भारतय् छापे यायेगु यानावयाच्वंगु खः । वहे इलय् जुइगु तःधंगु भ्रष्टाचार व कमिशनया कारणं थुगुसिनिसें अख्तियार दुरुपयोग अनुसन्धान आयोगं नेपालय् हे न्ह्यसःपौ छापे यायेत निर्देशन बिउगुलिं उगु न्ह्यसःपौ नेपालय् छापे यायेत्यंगु खः ।
