तमलोपा नं विभाजित, गुम्ह सभासद्त पाखें मेगू हे पार्टी दर्ता

मधेशवादी पार्टीत तज्याय्गु झ्वलय् आः तराई मधेश लोकतान्त्रिक पार्टीया नां नं लाःगु दु । उद्योग मन्त्री महेन्द्र राय यादवया नेतृत्वय् असन्तुष्ट पक्षं पार्टी परित्याग याःगु दु । पार्टी दुने सामुहीक नेतृत्वया भावना विकास मजूगु व आन्तरिक लोकतन्त्र मदुगु धासें मन्त्री यादव नापं गुम्ह सभासद्तय्सं तमलोपा पार्टी परित्याग यानाः तमलोपा (नेपाल) नांया पार्टी दर्ता याःगु दु ।

मन्त्री यादव नापं उद्योगराज्य मन्त्री दानबहादुर चौधरी, सभासद्त गोविन्द चौधरी, अरविन्द साह, सुमित्रा यादव, अर्मिला महतो, रमणी राम, मोहमद सल्लाउद्दिन व चन्दन साहं पार्टी परित्याग याःगु खः ।

थ्वस्वयां न्ह्यः मधेशवादी दलत मधेशी जनअधिकार फोरम व मधेशी जनअधिकार फोरम (लोकतान्त्रिक) विभाजित जुइधुंकूगु खः ।