राष्ट्रपतिया ज्याया विरुद्ध माओवादी अदालतय् वनीगु

सरकारी निर्णय विपरीत सेनापति रुक्मांग कटवालयात पदय् बहाल जुइत राष्ट्रपति डा. रामवरण यादवं ब्यूगु निर्देशन गैरसंवैधानिक जूगु ठहर यासें उकीया विरुद्ध एकीकृत नेकपा (माओवादी) अदालतय् वनीगु जूगु दु ।

प्रधानमन्त्री निवास बालुवाटारय् सोमवाः च्वंगु पार्टी सचिवालया आकस्मिक बैठमं राष्ट्रपतिं नागरिक सर्वोच्चताया विरुद्ध वंगु निष्कर्ष पिकागु दु । सेनापतियात पदमुक्त याःगु खँय् राष्ट्रपतिं कार्यकारी भूमिका निर्वाह मयाःगु द्वपं ब्यसें माओवादीं राष्ट्रपतिया ज्या २०५९ माघ १९गते तत्कालिन जुजु ज्ञानेन्द्रं ल्ह्वंगु पलाः नाप तुलना याःगु दु ।

बैठकय् निर्णय जू कथं थौं न्हिनय् स्वताः ईलय् प्रधानमन्त्री देय्या निंतिं सम्बोधन याइगु ज्याझ्व दुसाः प्यताः ईलय् हाकनं सचिवालय्या बैठक सःतुगु दु ।