थरुहटं बन्द लितकाल
झिंस्वन्हू न्ह्यः निसें सरकारं याःगु सहमति कार्यन्वयन यायेमाःगु माग यासें थरुहट मंका संघर्ष समितिं याना वयाच्वंगु तराईया नीनिगू जिल्ला बन्द लितकाःगु दु ।
देशय् जुयाच्वंगु उथलपुथल यात ध्यानय् तयाः संघर्ष समितिं सोमवाः आन्दोलनया ज्याझ्व लितकाःगु खः । संघर्ष समितिया दुजः यागेन्द्र थारुया कथं नकतिनिया राजनीतिक घटनाक्रम व थ्व सरकारया वैध्यता सिधगुलिं बन्द लित कयाःगु खँ धयादीगु दु । थारुया कथं बन्द लितःकासां प्राकृतिक श्रोतय् कब्जा यायेगु व स्थानीय निकाय बहिष्कार यायेगु धासाः न्ह्यानांतुं च्वनी ।
बन्द लितकायेवं तराईया जनजिवन सामान्य जूगु दु । सवारीसाधन चालेजूगु दुसा पसः, ज्याकू, कालकारखाना, विद्यालय आदि चाःगु दु ।
संघर्ष समितिं बन्द लितःकासां आः न्हूगु कथंया आन्दोलन यायेगु तयारी यानाच्वंगु दु । थुकीया निंतिं थारु समुदायं आन्तरीक बैठक न्हाकूगु दु ।
