एमाले मन्त्रीतय्सं राजिनामा बिल
फोरम व सदभावनां नं सरकार त्वःतीगु
सत्ता साझेदार प्रमुख दल एमाले सहित मधेशी जनअधिकार फोरम व सदभावना पार्टीं माओवादी नेतृत्वया मंकाः सरकारपाखें पिहां वनेगु निर्णय याःगु दु ।
एमाले स्थायी समितिया बैठक सिधयेवं एमाले मन्त्रीत सरकारपाखें लिहांवयेत बालुवाटर थ्यंकाः प्रधानमन्त्री पुष्पकमल दाहाल प्रचण्डयात राजिनामा लःल्हाःगु खः ।
माओवादीं एकपक्षीय ढंगं प्रधान सेनापतियात चीकेगु निर्णय याःगु धासें असन्तुष्टि प्वंकूगु सत्ता साझेदार दलत मध्ये प्रमुख दलं सरकार त्वतेगु निर्णय यायेवं माओवादी सरकार संकटय् लाःगु दु ।
एमाले पाखें सरकारया नेतृत्व यानाच्वंम्ह उपप्रधान व गृहमन्त्री बामदेव गौतमं बालुवाटारय् प्रधानमन्त्रीया नापलना राजीनामा लःल्हानादीगु खः । एमालें उपप्रधान व गृह नापं जलश्रोत, उद्योग, स्थानीय विकास, युव तथा खेलकुद व वन तथा भूसंरक्षण मन्त्रालयया जिम्मेवारी कयाच्वंगु खः ।
अथेहे मेगु सत्तारुढ घटक सदभावना पार्टीं नं प्रधानसेनापतिया कारवाही प्रति असन्तुष्टि प्वंकूसें सरकारं पिहांवनेगु निर्णय याःगु खँ पार्टी अध्यक्ष एवं आपूर्ति मन्त्री राजेन्द्र महातों जानकारी बियादिल ।
अथेहे मधेशी जनअधिकार फोरमया संसदीय दलया बैठकं सरकारपाखें लिहांवयेगु निर्णय याःगु दु । फोरम संसदीय दलया थौं च्वंगु बैठकं थःगु पार्टी पाखें सरकारय् दुपिं मन्त्रीतय्त लित सतेत केन्द्रीय समितियात सिफारिस यायेगु निर्णय याःगु दु ।
विदेश भ्रमणय् दुम्ह अध्यक्ष उपेन्द्र यादव देय् लिहां वयेधुंकाः च्वनीगु केन्द्रीय समितिया बैठकं सरकारपाखें लिहां वयेगु निर्णय याइगु जूगु दु ।
