कांग्रेसया नेतात जिल्ला जिल्लाय्
येँ (सन्ध्या टाइम्स)/शान्ति व लोकतन्त्रय् खतरा अप्वयावःगुलिं नेपाली कांग्रेसं कन्हसंनिसें न्ह्याकीगु जनजागरण अभियानया निंतिं थुकिया नेतात जिल्ला जिल्लाय् ब्वाँय् वंगु दु ।
राष्ट्रियताय् संकट वःगु ठहर यासें राष्ट्रिय मेलमिलाप दिवसया सन्दर्भय् लाकाः कांग्रेसं देय्न्यंकं थ्व अभियान न्ह्याकेत्यंगु खः। अभियान ताःलाकेत कांग्रेसया वरिष्ठ नेता शेरबहादुर देउवा चितवनय्, संसदीय दलया नेता रामचन्द्र पौडेल सप्तरी वंगु दुसा सभापति सुशील कोइराला थौंहे विराटनगर वनीगु ग्वसाः दु ।
अथे हे मेमेपिं नेतात नं थःथःगु जिल्लाय् वनेगु शुरु जूगु दु। कांग्रेसया १२ क्वःगु महाधिवेशनं पारित याःगु नीतियात थ्वहे अभियानपाखें ७५ गुलिं जिल्लाय् थ्यंकेगु खँ नं कांग्रेसं धाःगु दु ।
