शीर्ष नेतात मोटरसाइकल र्यालीइ
येँ (सन्ध्या टाइम्स)/नेपाल भ्रमण वर्ष २०११ या न्ह्यःने लाकाः थौं सुथय् येँनिसें नगरकोट तक जूगु छगू मोटर साइकल र्यालीइ थीथी पार्टीया शीर्ष नेतातय्सं ब्वति काल।
नागढुंगाय् माओवादी अध्यक्ष पुष्पकमल दाहाल प्रचण्ड व संविधानसभाया अध्यक्ष सुवास नेम्वाङं उलेज्या यानाः र्याली न्ह्याकूगु खः। र्यालीयात नेकां सभापति सुशील कोइरालां कलंकीइ, न्हूबानेश्वरय् एमालेया अध्यक्ष झलनाथ खनालं लसकुस यानादीगु दु ।
अथे हे मधेसी जनअधिकार फोरमया अध्यक्ष उपेन्द्र यादव, ख्वपय् नेपाल मजदुर किसान पार्टीया अध्यक्ष नारायणमान बिजुक्छे अले यलया जावलाख्यलय् नागरिक समाजया प्रतिनिधितय्गु उपस्थितिइ र्याली याःगु दु। राष्ट्रिय सहमतिया आधारय् थातं शान्ति पलिस्था यायेगु व संविधान च्वज्या पूवंकेत दबाव बीगु नापं पर्यटन प्रबर्द्धनय् ग्वाहालि यायेगु ताः तयाः अथे उगु र्याली याःगु खः ।
