थौं हेल्हो ल्होछार

येँ (सन्ध्या टाइम्स)/नेपाःया आदिवासी जनजाति गुरुङतय्सं थौं तःजिक हेल्हो ल्होछार थीथी ज्याझ्वः याना हनाच्वंगु दु। थौं सुथंनिसें तोल्हो ल्होछार क्वचायाः हेल्हो ल्होछार शुरु जूगु खः। तोल्हो धइगु धुँ अले हेल्हो धइगु भौ खः। उकिं धुँदँ क्वचायाः थनिंनिसें भौचा दँ शुरु जूगु दु। गुरुङ समुदाययात न्हापा तमु धाइगु खः। लिपा जक गुरु जुजुं गुरुङ जूवंगु खँ गुरुङ संस्कृतिविद गर्जबहादुर गुरुङं कनादीगु दु। विश्वया न्ह्यागु देशय् वनाच्वंपिं जूसां गुरुङतय्तसं थौंया दिनय् थःगु जातीय म्हसीका पिब्वइगु लं फिनाः गुँभ्वय् वनाः ल्होछार नखः न्यायेकेगु याइ। गुरुङतय्सं दँय्दसं थौंया दिनय् न्हूदँ ल्होछार हना वयाच्वंगु दु ।