पशुपतिइ सीम्ह उइगु मेशिन तइगु
येँ (सन्ध्या टाइम्स)/पशुपति विकास कोषं थ्वहे वइग माघ महिनाय् आर्यघाट नापसं विद्युतीय शवदाह गृह दयेकीगु जूगु दु। सीपिं मनूतय्त सिँ च्याकाः उइगु त्वःताः विद्युतीय मेशिनं उइगु ताः तयाः थज्याःगु शवदाह गृह दयेकेत्यंगु खः ।
सिँ च्याकाः मनू उइबलय् उगु पाशुपत लागाया वातावरण व पर्यावरण प्रदूषण जुयाच्वंगु कारणं उकियात म्हो यायेगु लागिं थ्व ग्वसाः न्ह्यःने हयागु खँ कोषं धाःगु दु ।
सीम्ह उइगु विद्युतीय मेशिन तयेत भवन निर्माणया लागिं कोलकाताया इन्डोमेण्ड इन्जिनीयरिङ सर्भिसयात ठेक्का नापं बीधुंकूगु खँ कोषया कोषाध्यक्ष नरोत्तम वैद्यं कनादिल। वय्कःया कथं उगु भवन जक दयेकेगु लागिं ४ करोड ५० लाख तका व मेशिनया लागिं २ करोड ६० लाख तका दां माः ।
मेशिनं सीम्ह उइगु थ्व मेशिनय् अलग अलग थासय् तयाः छक्वलं निम्ह तक सीम्ह उइ जिउसा छम्ह सीम्ह उइत ४५ निसें ६० मिनेट तक ई काइ। यदि माघं भवन दयेकेगु ज्या न्ह्यात धाःसा खुलाया दुने निर्माण क्वचाइगु खँ नं कोषाध्यक्ष वैद्यं कनादिल ।
