सुडानय् सामान छ्वयेत प्रमया निर्देशन
प्रधानमन्त्री माधवकुमार नेपालं सुडानया डार्फरय् खटे जुयाच्वंपिं नेपाल प्रहरीयात आवश्यक सामान छ्वयेत निर्देशन बियादीगु दु ।
प्रधानमन्त्री नेपालया अध्यक्षताय् थौं सिंहदरवारय् गृहमन्त्री, अर्थमन्त्री, प्रहरी महानिरिक्षक व व्यवस्थापिका संसदया राज्य व्यवस्था समितिया सभापति दथुइ जूगु सहलहलय् प्रधानमन्त्री नेपालं आवश्यक सामान छ्वयेत निर्देशन बियादीगु खः ।
उगु सहलहलय् अन खटे जूपिं प्रहरीतय्त आर्म्ड प्रर्स्नल अरिअर (एपीसी), गाडी नापंया सामान परिचालन यायेत अर्थ मन्त्रलाय वा नेपाल प्रहरीया कल्याण कोषं ध्यबा निकास यानाः सामान छ्वयेत गृहमन्त्रालयं माः कथं तयारी यायेगु निर्णय जूगु गृहमन्त्री भीम रावलं धयादिल ।
थ्वस्वयां न्ह्यः मंगलवाः च्वंगु राज्य व्यवस्था समितिया मुँज्यां डार्फरय् शान्ति स्थापनार्थ खटे जुयाच्वंपिं नेपाल प्रहरीयात आपश्यक सामान झिन्हुया दुने छ्वयेत निर्देशन ब्यूगु खः ।
