आन्दोलनया नितिं धाःगु प्रशिक्षण प्रभावित जुइगु संभावना
येँ (सन्ध्या टाइम्स)/एकीकृत माओवादीया थौं सुथय् च्वंगु स्थायी समितिया बैठक स्थगित यायेमाःगु नापं केन्द्रीय कमिटीया बैठक २० गतेनिसें च्वनीगु जुयाः आन्दोलनया नितिं देय्न्यंकं न्ह्याकीगु धाःगु प्रशिक्षण ज्याझ्वः प्रभावित जुइगु संभावना अप्वया वःगु दु ।
थौं च्वंगु बैठकय् जिम्मेवारी बाँडफाँडया सवालय् विवाद जूगुलिं बैठक हे स्थगित यायेमाःगु नापं माओवादीया अध्यक्ष प्रचण्डं आः वइगु २० गतेनिसें हे केन्द्रीय कमिटीया बैठक च्वनेगु धकाः आह्वान यानादीगुलिं कंस शुक्रवाःनिसें न्ह्याकीगु धाःगु प्रशिक्षण ज्याझ्वः प्रभावित जुइत्यंगु खः।
राष्ट्रिय स्वाधिनता व जनजीविकाया नितिं संघर्ष यायेत धकाः वइगु शुक्रवाःनिसें देय्न्यंकंया कार्यकर्तातय्त प्रशिक्षण अभियान शुरु याइगु जूगु दु ।
पुष ३० गते तक न्ह्याइगु उगु प्रशिक्षणया झ्वलय् वैचारिक रुपं कार्यकर्तातय्त तयार यायेगु जुइ धकाः माओवादीं धाःगु दु। वंगु मंसिर महिनाय् जूगु पालुङटारया बैठकं दयेकूगु कार्ययोजना कथं अथे अभियान न्ह्याकेत्यंगु खः ।
प्रशिक्षण अभियानया झ्वलय् वइगु १८ गते तमुवान राज्यया पोखराय्, २० गते मगराँत राज्यया दाङय्, २३ गते भेरी कर्णाली राज्यया सुर्खेतय्, २८ गते अवध राज्यया भैरहवाय्, ३० गते मिथिला व भोजपुरा राज्यया मंकाः कथं सर्लाही लिम्बुवान व कोचिला राज्यया ३० गते झापाया दमकय् प्रशिक्षण जुइ धाःगु दुसा मेमेगु राज्याया मिति धाःसा तयार याःगु मदुनि। अथे प्रशिक्षण अभियानया झ्वलय् वइगु शुक्रवाः येँया भृकुटीमण्डपय् विशेष कमान्डो अन्तर्गतया कार्यकर्तातय्त प्रशिक्षण बीगु जुइ धकाः नं माओवादीया छम्ह नेतां कनादीगु दु ।
