प्रधानसेनापति कटवालयात अवकास
सरकारं प्रधानसेनापति रुक्मांग कटवालयात अवकास ब्यूगु दु । थौं च्वंगू मन्त्रीपरिषदया बैठकं कटवालयात अवकास ब्यूगु खः । तर सत्ता साझेदार दलत एमाले, मधेशी जनअधिकार फोरम, सद्भावना लगायत दलतय्सं बैठक बहिष्कार याःगु खः ।
थौंया मन्त्रीपरिषदया बैठक न्ह्यायेवं प्रधामन्त्री पुष्पकमल दाहाल प्रचण्डं थ्व प्रस्ताव तयादीगु खसाः सत्ता साझेदार दलत थुकी सहमति मदु धकाः बैठकं पिहांवंगु दु । थ्व निर्णय लिपाः कायम मुकायम प्रधानसेनापतिइ निगूगु बरियताया कुलबहादुर खड्कायात नियुक्ति याःगु दु ।
बैठक लिपाः सरकारया प्रवक्ता व संचारमन्त्री कृष्णबहादुर महरां सैनिक ऐन २०६३या दफा ११ (३) बमोजिम प्रधानसेनापति कटवालयात पदमुक्त याःगु धयादिल ।
बैठक न्ह्यं प्रधामन्त्री दाहालं कटवालयात प्रधानमन्त्री निवास बालुवाटरय् सःताः स्वयेक्षिक अवकाश बीत इनाप याःगु खसां उकीयात कटवालं अस्वीकार याःगु खः । सरकारं थ्व निर्णय याःगु ईलय् कटवाल व कायम मुकायम प्रधानसेनापति खड्का बालुवाटारय् हे दुगु खः ।
बालुवाटारय् हे कटवालयात अवकाश पौ लःल्हाःगु खसां वयेकलं थ्व पौ कायेत अस्वीकार याःगु ख: । थ्व निर्णय लिपा कटवालं सैनिक मुख्यालय् भद्रकाली आकस्मिक बैठक सःतुगु दु ।
बैठक लिपाः एमाले पार्टीया आकस्मिक बैठकय् व्यस्थ जूगु दुसाः येँया थीथी थासय् माओवादी भातृ संगठनतय्सं विजय जुलुस पीकाःगु दु ।
