अभिनन्दनलिसें महोत्सव ज्याझ्वः नं क्वचाल

यल (सन्ध्या टाइम्स)/बाद्य शिरोमणि स्व. उस्ताद श्री गणेशलाल श्रेष्ठया १०९ क्वःगु बुदिंया लसताय् बुबहाल, गाबहाल यलय् 'अभिनन्दन समारोह' व 'न्याक्वःगु बाद्य शिरोमणि शास्त्रीय संगीत महोत्सव २०६७' या ज्याझ्वः क्वचाल ।

उगु ज्याझ्वलय् नीखुम्ह मस्तय्सं तबला, भ्वाइलेन व गीतार थें जाःगु थीथी बाजं ब्यांचुलि लसय् थानाः ज्याझ्वलय् उपस्थित जूपिं सकसित लसकुस याःगु खः। संगीत प्रविण मोहनप्रसाद जोशीया सभानायःसुइ न्ह्याःगु उगु ज्याझ्वलय् संगीत साधक श्री रामहरि गुरुङ्ग मूपाहाँकथं उपस्थित जुयादीगु खः। त्वादेवाय् मत च्याकाः ज्याझ्वःया विधिवत उलेज्या यासें मूपाहाँ भाजु जोशीं बाद्य शिरोमणिया किपाय् स्वांमाः क्वखायेकेगु ज्या नं जूगु खः। उगु ज्याझ्वलय् मूपाहाँ भाजुं गणेशलाल श्रेष्ठयात लुमंकादिसे वय्कःया व्यक्तित्वया बारे चर्चा नं यानादीगु खः ।

उगु ज्याझ्वलय् ८६ दँ थ्यंम्ह 'मछिन्द्रनाथ मृदङ्ग भजन मण्डल' या नायः वरिष्ठ गायक उस्ताद श्री नजरमान रन्जितकारयात १०,००० तका नगद सिरपाः व दोसल्लां न्ययेकाः अभिनन्दन याःगु खः। अभिनन्दित वरिष्ठ भजन गायक उस्ताद नजरमान रन्जितकारं मृदङ्ग भजन प्रस्तुत यानादीगु खः। उगु हे ज्याझ्वलय् मिलन तण्डुकार, ध्रुबेशचन्द्र रेग्मी व रमेश पोखरेलपिंसं 'जल तरङ्ग' सितार थायेगु व रागया नं न्ह्यब्वयादीगु खः ।

श्री गंगाधर बज्राचार्यं लसकुस न्वचु बियादीगु उगु ज्याझ्वःया व्यवस्थापन महाविहार सुधार समितिं याःगु खःसा आयोजना शिरोमणि घरानां याःगु खः ।