शासकीय व व्यवस्थापकिय स्वरुपय् जूगु सहमति अनुमोदन
संविधानसभाय् प्रतिनिधित्व याइगु २७गू दलया मुँज्यां राज्यया शासकीय स्वरुप व व्यवस्थापकिय स्वरुपया विषयलय् उच्चस्तरीय कार्यदलं याःगु सहमतियात अनुमोदन याःगु दु ।
उच्चस्तरीय कार्यदलं सहमति याःगु बुँदायात अनुमोदन यायेत व ल्यँ दनीगु संविधान निर्माणया विवादित विषयलय् सहलह यायेत सिंहदरवारय् थौं च्वंगु २७गू दलया मुँज्यां राज्यया शासकीय स्वरुप निर्धारण समितिइ दुगु बुँदा मध्ये निगू बुँदायात अनुमोदन याःगु खः ।
कार्यदलं अदालत दुने न्ययाधिस नियुक्त यायेगु व संविधानया लिप्पाँगु व्याख्या सर्वोच्चं याइगु धाःसां थौं च्वंगु मुँज्यां दलत दथुइ उगु बुँदाय् विवाद जुइवं न्यायपालिका बारे छुं सहमति यायेमफुत ।
विवादित विषयत ज्यंकेत निस्वंगु कार्यदलं २१०गू मध्ये १२७गू बुँदाय् सहमति याःगु खःसा अझ नं ८३गू बुँदा ल्यँ दनी । निर्वाचन प्रणाली, देय्या कार्यकारी प्रमुख छु जुइगु, संविधानया लिप्पांगु व्याख्या सुनां याइगु थंज्याःगु बारे दलत दथुइ अझ नं विवाद जुयावंगु दु ।
