स्वार्थी त्वःतुसाः झिंन्यागू मिनेटय् हे न्हूम्ह प्रधानमन्त्री : थापा

राष्ट्रिय जनशक्ति पार्टीया नायः सूर्यबहादुर थापां नेपाःया मू स्वंगू राजनीतिक दलतय्सं थःथःगु दलीय स्वार्थ त्वःतुसाः झिंन्यागू मिनेटय् हे देशं न्हूम्ह प्रधानमन्त्री प्राप्त याइगु दाबी यानादीगु दु ।

मालिगाँमय् च्वंगु थःगु हे छेँय् थौं पत्रकार सम्मेलन यानादिसें नायः थापां देय्या राजनीतिक गतिरोध क्वचायेकेत स्वंगू मू दलतय् अहम भूमिका जुइगु धासें स्वंगू दल मिले जुसाः याकनं हे सहमित जुइगु नं धयादिल ।

वय्कलं स्वंगू राजनीतिक दलत दथुइ असहमति अप्वयाच्वंगुलिं शान्ति प्रक्रिया व संविधान निर्माणय् अन्यौलता अप्वयाच्वंगु धयादिल । वय्कलं यदि दलत थंज्याःगु हे प्रक्रियां न्ह्यानाच्वंसाः उकीं विष्फोटक रुप धारण याइगु ख्याच्वः नं बियादिल ।