'न्हूगु संविधान मानव अधिकार मैत्री'

सभामुख सुभाषचन्द्र नेम्वाङं न्हूगु संविधान मानव अधिकार मैत्री जुइगु धयादीगु दु ।

इन्हुरेड इन्टरनेशनलं थौं येँय् याःगु छगू ज्याझ्वलय् सभामुख नेम्वाङं मानवअधिकारया विषयलय् दलत दथुइ विवाद मदुगुलिं न्हूगु संविधान मानवअधिकार मैत्री जुइगु दाबी यानादिल । वय्कलं इलय् हे संविधान निर्माण यायेत दलत दथुइ सहमति आवश्यक जूगु धयादिल । नापं वय्कलं थप जूगु इलय् संविधासभां हे संविधान निर्माण यायेगुया विकल्प मदुगु धयादिल ।

ज्याझ्वलय् इन्हुरेड इन्टरनेशनल व एक्सन एड नेपालं तयार याःगु न्हूगु संविधानय् मानव अधिवकारया मापदण्ड दुथ्याकातःगु सफू सभामुख नेम्वाङं उलेज्या यानादीगु खः । सफूतिइ नेपाःया संवैधानिक इतिहास व हिलंया थीथी देय्या संविधानय् दुथ्याकातःगु मानव अधिकारया अवस्थायात दुथ्याकातःगु दु ।