प्रधानसेनापति प्रकरणया निर्णय थौं जुइगु
सरकारं प्रधानसेनापति रुक्मांग कटवालयात कारवाही यायेगु बारे थौं निर्णय याइगु जूगु दु । सरकारया नेतृत्व यानाच्वंगु माओवादीं मेमेगू दलनाप सहमती मजुसां कारवाही यायेगु मनस्थिति देयेकूगु दु । दलत दथुइ सहमति मजुसाः सत्ता साझेदार दलतनापया सहमती जुसां प्रधानसेनापतियात कारवाही याइगु जूगु दु ।
थुकीया बारे सहलह यायेत प्रधानमन्त्री पुष्पकमल दाहालं कांग्रेस सभापति गिरिजाप्रसाद कोइराला यात टेलिफोन यानाः प्रधानसेनापतियात कारवाही यायेत्यनाःगु जानकारी ब्यूगु खः । नापं वयेकलं कोइरालायात नापलायेत ई फ्वंगु खसां न्हिनय् प्यताः ईलय् जक वयेत इनाप यासें व ई तक छुं अप्रिय निर्णय मयायेत इनाप यानादीगु खः ।
थुकीया बारे सहलह यायेत कांग्रेसं सर्वदलीय बैठक सःतुगु दुसाः माओवादीं धासाः सत्तारुढ दलत दथुइ नं सहमति मजूसाः मन्त्रीपरिषदया बहुमतया आधारय् जुसां प्रधानसेनापतियात कारवाही यायेत स्वयाच्वंगु दु ।
