थरुहट नापया वार्ता निष्कर्षबिहीन
सरकार व आन्दोलनरत थरुहट मंकाः संघर्ष समिति दथुइ शनिवाः जूगु वार्ता बिना निष्कर्ष क्वचाःगु दु ।
सिंहदरवारय् च्वंगु शान्ति मन्त्रालयय् जूगु वार्ताय् समितिं तराईलय् जारी आम हडताल लितः मकायेगु अडान कायेवं वार्ता बिना निष्कर्ष क्वचाःगु खः । करीब पीन्याःगु मिनेट जूगु वार्ताय् सरकारं न्हापा याःगु सहमति कार्यान्वयन यायेगु प्रतिबद्धता यासें बन्द लितः कायेत याःगु इनापयात समितिं अस्विकार याःगु खँ सरकारी वार्ता पुचःया संयोजक शान्तिमन्त्री जनार्दन शर्मां धयादिल ।
संघर्ष समितिया पाखें वार्ता पुचःया संयोजक डील्ली चौधरीं धासाः थःपिनिगु मागय् प्रवेश हे मयासें सरकारी पक्षं बन्द लितः कायेमाःगु पूर्व शर्त तःगुलिं वार्ता निष्कर्षबिहीन जूगु धयादिल । शान्तिमन्त्री शर्मां कन्हय् न्हिनय् स्वताः ईलय् हाकनं वार्त जुइ धासां चौधरीं वार्ता जुइगु वा मजुइगु खँ सरकारय् निर्भर जूगु प्रतिक्रिया बियादिल ।
सरकारं वंगु चैत १ गते आदिवासी जनजाति महासंघ व थारु सम्बद्ध संघ संगठनत नाप याःगु खूगु बुँदे सहमति कार्यान्वयन मजूगु धासें समितिं झिंछन्हू न्ह्य: निसें तराईया थीथी नीनिगू जिल्लाय् आम हड्ताल यानावयाच्वंगु दु ।
