'माओवादीं वाउँगु घाँय् क्यनेवं नेतात अलमल'
येँ (सन्ध्या टाइम्स)/न्ह्याबलें ध्याचू नकाः न्ववायेगु अले माओवादीयात ब्वः बीगु याना वयाच्वनादीम्ह एमाले स्थायी समितिया दुजः केपी शर्मा ओलीं थुगुसी धाःसा एमालेया हे शीर्ष नेतातय्त नं ध्याचू नकादीगु दु ।
नेता ओलीं माओवादीपाखें वाउँगु घाँय् क्यनेवं एमालेया शीर्ष नेतात उकी हे अलमल जूगुलिं न्हूगु संविधान निर्माण व शान्ति प्रक्रिया जटिल अवस्थाय् थ्यंगु खः धयादीगु दु।
प्रेस चौतारी सप्तरीपाखें थौं सुथय् राजविराजय् याःगु पत्रकार भेटघाट ज्याझ्वलय् न्ववासें नेता ओलीं अथे धयादीगु खः। वय्कलं शीर्ष नेतातय्गु हे कारणं देशय् समस्या ब्वलंगु खः धकाः द्वपं नं बियादिल ।
वय्कलं धयादिल, 'माओवादीं वाउँगु घाँय् क्यनेवं नेपाली कांगेस व एमालेया नेतात अल्झे जूगु दु, माओवादी संविधान निर्माण व शान्ति प्रक्रियाप्रति इमान्दार जूगु मदु, मेमेपिंत नं सक्रिय याके बियाच्वंगु मदु ।'
एकीकृत माओवादीया लडाकु व ल्वाभः ल्यंका तयेगु प्रबृत्तिं देशयात तानाशाहीपाखे यंकाच्वंगु दु धयादिसें वय्कलं माओवादीया ज्याय् लानाः मूमू दलया मूमू नेतात समाधान यायेगु थासय् पंगः जुयाच्वंगु टिप्पणी यानादिल।
राष्ट्रसंघीय मिसन अनमिनया म्याद थप जुइ मखु धयादिसें नेता ओलीं अनमिनयात बिदाई याये धुंकाः संयन्त्र दयेकाः विशेष समितिया मातहतय् लडाकुयात तयेमाः धकाः नं बः बियादिल ।
