नेवानि महाप्रवन्धकया लागिं लाकांमाः तयार
येँ (सन्ध्या टाइम्स)/नेपाल वायुसेवा निगमया कार्यकारी अध्यक्ष सुगतरत्न कंसाकार लगायत खुम्ह पदाधिकारीतय्त विमान न्यायेगु ज्याय् भ्रष्टाचार यात धकाः अख्तियारपाखें मुद्दा तयेवं निगमया कर्मचारीतय्सं अनया महाप्रवन्धक केबी लिम्बुयात नं ज्याकुथी हे दुमकायेगु निर्णय याःगु दु। छुं जुयाः लिम्बु ज्याकुथी दुहां वल धाःसा वयात लाकांमाः क्वखायेकेगु धकाः अन लाकांमाः नं तयार यानातःगु दु। कर्मचारी सूत्रं धाः कथं महाप्रवन्धक लिम्बुं हे जहाज न्यायेगु थ्व ज्यायात अख्तियारय् यंकूगु खः धासें वय्कःया विरुद्ध थ्व पलाः ल्ह्वंगु खः। निगमय् लिम्बुयात ज्याकुथी दुकायेमाः धाइपिं कर्मचारीत नं नं पिहां वल धकाः हल्ला जूसां वास्तवय् कर्मचारी युनियन वय्कःयात दुमकायेगु पक्षय् छधी हे जुयाच्वंगु खँ नं सूत्रं धाःगु दु ।
अनया कर्मचारीतय्त प्रधानमन्त्री माधव नेपालं जहाज न्यायेगु लागिं सरकारयात इनाप यानाः निगमपाखें 'ठाडो प्रस्ताव' छ्वयाहजि, जिं सदर याना बी धकाः आश्वासन बिउगुयां कन्हय कुन्हु हे अख्तियारपाखें थुगु मुद्दा दायर याना बिउगुलिं निगमयात जहाज न्याके मबीपिं हवाई माफियाया पहुँच अख्तियार तकं थ्यंगु आशंका याना हःगु दु ।
