आसंका व अविश्वास मयायेत अर्थमन्त्रीया इनाप
एकीकृत नेकपा माओवादीया वरिष्ठ नेता व अर्थमन्त्री डा. बाबुराम भट्टराईं माओवादीयात सरकार त्वत्येत बाध्य यायेत स्वयाच्वंगु धयादीगु दु । राष्ट्रिय व अन्तराष्ट्रिय शक्ति केन्द्र मिलेजुया माओवादीयात सरकार त्वत्येत बाध्य यायेत स्वयाच्वंगु धयादिल ।
लोकतन्त्र व शान्तिया निंतिं नागरिक आन्दोलनं शनिवाः येँय् याःगु ज्याझ्वलय् वयेकलं प्रधानसेनापितं अनुशासनया उल्लंघन यागुलिं सरकार कारवाही यायेत बाध्य जूगु धयादिल । वयेकलं विश्वयय् सैनिक सर्वोच्चताया कारण यक्व दुर्घटना जूगु दसु ब्यूसें वयेकलं अनुशासन उल्लंघन यावले तकं कारवाही मयागुलिं थ्व परमपरा व नजीर स्थापित जुइ धयादिल । वयेकलं धयादिल, - 'थुकीं देशय् नागरिक सर्वोच्चता सिवें फौजी सर्वोच्चता स्थापित याइ ।' वयेकलं नेपालय् लोकतान्त्रिक मूल्य मान्यता स्थापित जुसां नं नागरिक सर्वोच्चता स्थापित जुइ मफुगु खँ धयादिल ।
माओवादीया छुं नं 'हिडन एजेण्डा' मदुगु धासें वयेकलं आशंका व अविश्वास मयायेत दलया नेतातय्त इनाप यानादिल । वयेकलं सकारात्मक व आशावादी जुया अग्रगमन, विकास व शान्ति स्थापनाया निंतिं न्ह्याः वनेमाःगुलि बः बियादिल ।
