भिडन्तय् ज्वाला पुचःया निम्ह सित

येँ (सन्ध्या टाइम्स)/वंगु चान्हय् रौतहटय् प्रहरीलिसे जूगु छगू भिडन्तय् लानाः भूमिगत जनतान्त्रिक ज्वाला पुचःया जिल्ला संयोजक नापं निम्ह कार्यकर्ता सीगु दु। प्रहरीं बिउगु जानकारी कथं उगु कारवाहीलय् लानाः जिल्ला संयोजक सुरेन्द्रबिन मुखिया (कमल) व सेक्रेटरी हरिश्चन्द्र सहनी (उमेश) सीगु खः। दर्जनौं हत्या, अपहरण व चन्दा आतंकया द्वपनय् प्रहरीं इमित मालाच्वंगु खः। रौतहटया धरमपुर गाबिसया सिंङगारमन घाटय् वंगु चान्हय् गस्तीइ वंपिं सुरक्षाकर्मीयात आक्रमण यायेवं निखेरं गोली हानाहान जुयाः थ्व सशस्त्र कार्यकर्तात सीगु खँ अनया प्रहरी उपरीक्षक पिताम्बर अधिकारीं कनादीगु दु। उगु इलय् छुं ई तक बांमलाक हे भिडन्त हे जूगु खँ नं धाःगु दु ।

खिउँसे च्वंगु इलय् जूगु उगु भिडन्तय् लानाः ज्वाला पुचःया मेपिं नं छुं कार्यकर्तात घाःपाः जूगु दयेमाः धकाः प्रहरीं अनुमान याःगु दु। भिडन्त लिपा प्रहरीं उगु लागाय् सर्च नं याःगु खः। सर्चया इलय् घटनास्थलं भारतय् दयेकूगु निपु पेस्तोल व झिगू राउण्ड गोली बरामद याःगु दु ।

अनया धरमपुर गाविसय् छेँ दुपिं बिन व सहनी छुं ई न्ह्यः तिनि बाराय् स्वम्ह माओवादी कार्यकर्तायात स्याःगु घटनाय् नं स्वापू दुपिं खः धाःगु दु। रौतहट व सर्लाही प्रहरीं इमित ताः ई न्ह्यवंनिसें हे मालाच्वंगु खः। इमित मालेत निगुलिं जिल्लाया सुरक्षा निकायं यक्व श्रम व ध्यबा खर्च यायेधुंकूगु दु। रौतहटय् थुमिसं स्थानीय व्यापारी, सर्वसाधारण, उद्योगपति, शिक्षक, कर्मचारीयात फोन यानाः ध्यबा कायेगु याना वयाच्वंगु खः ।