युवा बौद्ध संघ ख्वपया नीप्यदँ बुन्हि
ख्वप (सन्ध्या टाइम्स)/युवा बौद्ध संघया नीप्यक्वःगु बुदिं मुनिविहारय् हन। त्रिभुवन विश्वविद्यालय बौद्ध अध्ययन विभागया पुलांम्ह अध्यक्ष डा. नरेशमान बज्राचार्यं उलेज्या यानादीगु उगु ज्याझ्वलय् वय्कलं बौद्ध समुदाय दुने ल्यनाच्वंगु विकृति व विसंगति चीकेगु ज्याय् थः व थःगु पुचः निरन्तर लगे जुयाच्वनागु खँ कनादिल। भिक्षुगणपाखें पञ्चशील प्रदान यानाः उगु ज्याझ्वः न्ह्याकूगु खः ।
युवा बौद्ध संघ ख्वपया नायः धर्मरत्न शाक्यया सभापतित्वय् जूगु ज्याझ्वलय् उपाध्यक्ष शाक्यान शाक्यं लसकुस यानादीगु खःसा सचिव तुल्सीकाजी मानन्धरं वार्षिक प्रतिवेदन न्ह्यब्वयादीगु खः। ज्याझ्वलय् बौद्ध संघया नायः त्रिरत्न शाक्य, बौद्ध सम्पदा संघया नायः तीर्थराज बज्राचार्य, बौद्ध अध्ययन संघया सचिव चन्द्रबहादुर उलक, मुनिविहार दायक परिषदया नायः रामकृष्ण बैद्यपिंसं न्ववानादीगु खः ।
