सेनापति विवाद नेपाःया आन्तरिक मामलाः : कीसी

जापनया उप-रक्षामन्त्री नोबुओ कीसीं प्रधानसेनापति विवाद नेपाःया आन्तरिक मामला जूगुलिं थुकीयात सहमतिया आधारय् क्वचायेकेमा धयादिल ।

निन्हुयंकया नेपाः भ्रमणया निंतिं शुक्रवा न्हिनय् येँय् थ्यंकादिम्ह उप-रक्षामन्त्री कीसीं त्रिभुवन अन्तराष्ट्रिय विमानस्थलय् संचारकर्मीत नाप खँल्हासें सेनापति विवादया बारेय् जापनय् नं जानकारी दुगु धयदिल । थुकीयात नेपाःया राजनीतिक दलतय्सं सहमतिया आधारय् क्वचायेकेमाःगु बिचाः वयेकलं प्वंकादिल ।

नेपाःया निन्हु भ्रमणया झ्वलय् वयेकलं संयुक्त राष्ट्रसंघीय मिसन अनमिन अन्तर्गत दुगु जापानी ल्वाभ अनुगमनकर्तायात नापलायेगु ज्याझ्व दु । वयेकलं आइतवाः सुथय् राष्ट्रपति डा. रामवरण यादव नापलायेगु ज्याझ्व दुसाः वयेकलं रक्षामन्त्री रामबहादुर थापा लगायत उच्चपदस्थ अधिकारीनाप सहलह यायेगु ग्वसाः दु ।