रुबेलया मुद्दाय् कारण देखाउ आदेश

उपप्रधानमन्त्री सुजाता कोइरालाया जिलाजं रुवेल चौधरीयात कारवाही यायेमाःगु माग यासें सर्वोच्च अदालतय् दायर जूगु रिटया विपक्षीयात कारण देखाउ आदेश जारी याःगु खः ।

वंगु शुक्रवाः इन्द्र बहादुर ठकुरुं गैरकानुनी ज्याय् संलग्न जूगु धासें रुबेलयात कारवाही यायेत माग यासें रिट दायर याःगु खः । उगु रिटय् न्यायाधीसत भरत उप्रेतीया एकल इजलासं प्रधानमन्त्री व मन्त्रिपरिषदया ज्याकू, उपप्रधानमन्त्री, गृहमन्त्री व प्रहरी महानिरिक्षकया ज्याकूयात झिंन्यान्हु दुने लिखित लिसः पेश यायेत आदेश ब्यूगु खः ।

रुबेलयात नेपाल टेलिकमया कमया कल वाइपास याःगु, नेपाल प्रहरीया सुडान स्थित राष्ट्रसंघीय मिसनय् ज्याकेट न्यायेगुलि घोटाला याःगु नापं थीथी अवैध ज्याय् संलग्न जूगु धासें कारवहीया माग यानाः रिट दायर जूगु खः ।