स्वंगू दलया मुँज्या निष्कर्षविहीन
संसदया नियमित अधिवेशन सःतेगु लगायतया विषलय् सहलह यायेत च्वंगु स्वंगू मुख्य राजनीतिक दलया मुँज्या बिनानिष्कर्ष क्वचाःगु दु ।
सिंहदरवार स्थित शान्ति मन्त्रालयलय् च्वंगु मुँज्याय् स्वंगूलिं दलतय्सं थःथःगु अडान कायेवं मुँज्याय् छुं सहमति जुइमफुगु खः । मुँज्याय् माओवादीं सत्ता साझेदार दलतय्सं लडाकुतय् बारे सहमति मजुइकं नियमित अधिवेशन मसःतेगु धकाः याःगु निर्णयया बारे प्रधानमन्त्री माधवकुमार नेपालया धारणा माग याःगु खः ।
लिसलय् प्रधानमन्त्री नेपालं सत्ता साझेदार दलत दथुइ संसदया अधिवेशनया विषयलय् छुं नं कथंया निर्णय मजूगु स्पष्ट यानादीगु खः । वयक्लं नियमित अधिवेशन सःते न्ह्यः धाःसा दलत दजुइ सहमति जुइमाःगु धयादिल ।
माओवादी लडाकु समायोजन व पुनःस्थापना लगायतया बारे सहलह यायेत मुँज्या सःतुगु जुसां मुँज्या एजेण्डाय् हे प्रवेश मयायेकं क्वचाःगु खः । मुँज्या लिपा कांग्रेस केन्द्रीय दुजः डा. रामशरण महतं मुँज्याय् माओवादी एजेण्डाय् प्रवेश यायेत माने मजूगुलिं लडाकुतय् बारे सहलह जुइमफुगु धयादिल ।
थ्वस्वयां न्ह्यः च्वंगु कांग्रेस व एमालेया मुँज्याय् निगू दलया नेतात दथुइ स्वंगू दलया मुँज्याय् मंकाः धारणा यंकेगु सहमति जूगु ख । प्रधानमन्त्री निवास बालुवाटारय् च्वंगु मुँज्याय् माओवादी लडाकुयात सेना समायोजन विशेष समितिया मातहत महयेकं संसद्या नियमित अधिवेशन मसःतेगु सहमति जूगु खः ।
