'हिम्मत दुसाः सरकार त्वःताः क्यं'

नेकपा एमालेया नेता केपी शर्मा ओलीं हिम्मत दुसाः सरकार त्वःता क्यनेत माओवादीयात हाथ्याः बियादीगु दु ।

शनिवाः येँय् जूगु छगू ज्याझ्वलय् न्ववासें नेता ओलीं माओवादीं सरकार त्वते धाःगु घुर्की जक जूगु धासे धयादिल, - 'हिम्मत दुसाः सरकार त्वःता क्यं ।'

नेकपा माओवादी सत्ताया ठेकेदार मजूगु धासें सरकारय् च्वनाः घुर्की क्यने मज्यू धयादिल । माओवादी ह्यांगू रंग इनातःगु तानाशाह जूगु द्वपं ब्यूसें वयेकलं पात्र, थाय् व सन्दर्भ जक पाःगु जुसां चरित्र अझ नं हिंसात्मक संगठन जूगु द्वपं बियादिल ।

माओवादीप्रति आक्रोशित खनेदुम्ह नेता ओलीं माओवादीं सेना नापं राष्ट्रपतियात नं विवादय् लाकेत स्वःगुलि आपत्ती प्वंकादिल । नेता ओलीं माओवादीं दक्वं संस्थायात कमजोर यानाः सत्ता कब्जा यायेत स्वःगु द्वपं बियादिल ।