सेनापतियात कारवाही मयायेत कांग्रेसं दबाव बीगु
नेपाली कांग्रेसं प्रधानसेनापति रुक्मांग कटवालयात कारवाही मयायेत दबाव बीगु ताःतयाः थीथी दलतनाप सहलह तीव्र यायेगु व पार्टी मार्फतया दक्वं निकायत सक्रिया याइगु जूगु दु ।
शनिवाः कांग्रेस सभापति गिरिजाप्रसाद कोइराला निवास महाराजगंजय् जूगु केन्द्रीय नेतातय् अनौपचारिक बैठकं माओवादीं सर्वसत्तावाद लादे यायेगु कुतः कथं सेनाय् हस्तक्षेप यायेत स्वःगु द्वपं ब्यूसें कांग्रेसं माओवादीया अडान विरुद्ध सत्तासाझेदार व मेमेगु दलत नाप सहलह यायेगु निर्णय याःगु दु ।
बैठकं पार्टीया दक्व भातृ संगठनतय्त परिचालन यायेगु तयारी याःगु दु । छुं दिं न्ह्यः च्वंगु केन्द्रीय समिति व सर्वदलीय बैठकं याःगु निर्णय कार्यान्वयन यायगु खँय् नं नेतातय्सं सहलह याःगु खः । सेनापतियात कारवाही यायेगु माओवादीया अभियान विरुद्ध दलत नाप सहलह यायेगु व जनदबाव सृजना यायेगु निर्णय बैठकं याःगु दु ।
अनौपचारिक बैठक लिपा कांग्रेस प्रवक्ता अर्जुननरिसंह केसीं एमाले, मधेशी जनअधिकार फोरम, तमलोपा लगायतया पार्टीत नाप परामर्श तिव्र यायेगु खँ धयादिल । सेनापति प्रकरणयात कयाः सरकार त्वतेगू माओवादीया धापू थःगु स्वार्थपूर्ति यायेगु चाल जूगु निष्कर्ष कांग्रेसं पिकाःगु वयेकलं धयादिल ।
