थारु समुदाय वार्ताया निंतिं तयार

‍‍थरुहट आन्तरिक बैठकय् व्यस्थ

झिन्हू न्ह्यः निसें आन्दोलन यानाच्वंगु थारु समुदाय सरकार नाप वार्ता यायेत तयार जूगु दु । शुक्रवाः बहनी सरकारं आन्दोलनकारीतय्त वार्ताय् वयेत इनाप यायेवं थरुहट आन्दोलनकारीत शनिवाः सुथय निसें अनौपचापरिक बैठकय् व्यस्थ जूगु दु । वार्ताया एजेन्डा क्वछीत आन्तरिक सहलह शुरु जूगु खः ।

थरुहट आन्दोलनया कारण तराई लागाः नापं देयायंकया जनजीवन अस्तव्यस्त जुयाच्वंगु ईलय् शान्ति तथा पुननिर्माण मन्त्रालयं आन्दोलनकारी थारु समुदाययात वार्ताय् वयेत पौ छ्वःगु खः । आन्दोलनकारीतय्सं सरकारया पौ सकारात्मक रुपं काःगु दु । सरकारं वार्ताया निंतिं ई बिया सःतुसाः वार्ता यायेत तयार जूगु खँ थारु नेता योगेन्द्र थारुं धयादीगु दुसाः शान्ति मन्त्री जनार्दन शर्मां न्हापा आन्दोलनकारी समुदाययात आन्दोलन स्थगित यायेत माग यानाच्वंगु दु ।

चैत १ गते थारु समुदाय नाप जूगु वार्ताया अधिकाशं सहमतित पूवने धुंकूगु व थारुतय् पहिचाननाप सम्बन्धित विषय संविधानय् संशोधन यायेत आवश्क गृहकार्य जूगु खँ मन्त्रालयं विज्ञप्ति न्ह्यथंनातःगु दु ।

झिन्हू तकया आन्दोलनया कारण तराईया अधिकार्श जिल्लाया जनता प्रत्यक्ष प्रभावित जूगु दु । गुलिखें थासय् प्रतिकार जुलुस तकं पिहांवःगु दु । आन्दोलनया कारणं देया अधिकाशं थासय् पेट्रोलियम पदार्थ लगायत खाद्यान्नया अभाव शरु जूगु दु ।