अनमिनया म्याद थप मयायेगु सरकारी निर्णय
एकीकृत नेकपा (माओवादीं) नेपाः स्थित राष्ट्रसंघीय मिसन अनमिनया म्याद शान्ति प्रक्रिया क्वमचातले थप यायेमाःगु माग यानाच्वंगु इलय् सरकारं अनमिनया म्याद थप मयायेगु निर्णय याःगु दु । थौं च्वंगु मन्त्रिपरिषदया मुँज्यां लडाकुतय्त तत्काल विशेष समितिया मातहतय् हयेगु धासें अनमिनया म्याद थप मयायेगु निर्णय याःगु खः ।
मुँज्यां रक्षा मन्त्री विद्यादेवी भण्डारीया अध्यक्षताय् स्वम्ह दुजः दुगु रक्षा निर्देशन समिति गठन याःगु दु । सूचना व संचार मन्त्री नापं सरकारी प्रवक्ता शंकर पोखरेलं उगु समितिं रक्षाया सम्बन्धी निर्णय याइगु धाःसां उकीया बारे थप छुं नं धयामदी ।
अथेहे सरकारं नेपाल राष्ट्र बैंक्या डेपुटी गभर्नरय् राष्ट्र बैंकया उच्च अधिकारीत गोपाल काफ्ले व महाप्रसाद अधिकारीयात नियुक्ति याःगु दु । अथेहे नेपाली सेनाया उपरथी नरेश बस्नेतयात निदँया म्याद थप याःगु दु साः नेपाल प्रहरीया एआइजीत रविन्द्र प्रताप शाह व मदन खड्कायात छसिकथं मानव संशाधनं कार्य विभागय् व कार्य विभागं मानव संशाधनय् सरुवा याःगु दु ।
