झिंन्यान्हु दुने उपस्थित जुइत कंसाकारयात निर्देशन
भ्रष्टाचारया द्वपं लाःम्ह नेपाल वायु सेवा निगमया कार्यकारी प्रमुख सुगतरत्न कंसाकारयात झिंन्यान्हुया दुने उपस्थित जुइत विशेष अदालतं निर्देशन ब्यूगु दु ।
विमान न्यायेगु प्रकरणय् भ्रष्टाचार याःगु धासें कंसकार नापं निगमया मेपिं ५म्ह कर्मचारीतय्त नं झिंन्यान्हुया दुने उपस्थित जुइत अदालतं निर्देशन ब्यूगु दु । न्ययाधीशत गौरीबहादुर कार्की, ओमप्रकाश शर्मा व केदारप्रसाद चालिसेया इजलासं ६म्हेसिया हे नांमय् झिंन्यान्हु दुने उपस्थित जुइत समाह्वान जारी याःगु खः ।
अख्तियारं कंसाकारयात बिगो बापत ५ करोड ७३ लख तका बैना व्याज सहित कायेत व १०दँया जेल सजायया माग याःगु दु । कंसाकार सहित अख्तियारं निगमया महाप्रबन्धक राजु केसी, गणेश ठाकु, कामु निर्देशक ज्ञानेन्द्र पुरुष ढकाल, मयुर शम्सेर राण व केशवराज शर्मा विरुद्ध शुक्रवाः मुद्दा दायर याःगु खः ।
