नेवि संघया चक्काजामया झ्वलय् ल्वापु

नेपाली कांग्रेस निकट विद्यार्थी संगठन नेपाल विद्यार्थी संघं त्रिचन्द्र क्याम्पसया स्ववियु सचिव सञ्जय यादवनापंया विद्यार्थीतय्त तत्काल त्वःतेमाःगु माग यासें थौं घौछि चक्काजाम याःगु दु । चक्काजमया कारणं येँया यातायात व्यवस्था घौछिया निंतिं अस्तव्यस्त जूगु खः ।

चक्काजामया झ्वलय् येँय् शंकरदेव व त्रिचन्द्र क्याम्पस पिने प्रहरी व विद्यार्थीत दथुइ ल्वापु जूगु दु । ल्वापु तःच्वयेवं स्थिति नियन्त्रणय् कायेत प्रहरीं छुं राउण्ड अश्रुग्याँस तकं कयेकूगु खः । ल्वापु लानाः सुं नं घाःपाः धाःसा मजू । आन्दोलनकारी नेविसंघं प्रहरीं मखुगू द्वपं बियाः विद्यार्थीतय्त ज्वंगु खँ धाःगु दु ।

वंगु पुष ४ गते त्रिचन्द्र क्याम्पसय् एमाले निकट अनेरास्ववियुया छम्ह नेताया ल्हाः पाला बीवं प्रहरीं नेविसंघया यादव सहितया नेतातय्त ज्वनायंकूगु खः ।