आः जहाज न्यायेगु ज्या ठप्प
येँ (सन्ध्या टाइम्स)/अन्ततः नेपाल वायुसेवा निगमयात न्हूगु विमान न्यायेके हे मबीगु षडयन्त्र कथं अख्तियारपाखें भ्रष्टाचारया द्वपं बियाः कार्यकारी अध्यक्ष नापं खुम्ह पदाधिकारीतय्त मुद्दा तःगु अनुमान थन यानाहःगु दु ।
देशय् सरकार परिवर्तन जुइत्यंगु दु। न्हूगु सरकार माओवादीया समर्थनय् गठन जुल धाःसा निगमं विमान हयेगु ज्या हानं न्ह्याकेफु धकाः उकियात पनेगु लागिं हे अख्तियारपाखें थ्व मुद्दा तःगु खँ नं सूत्रं अनुमान याःगु दु।
अख्तियार दुरुपयोग अनुसन्धान आयोगपाखें म्हीग शुक्रवाः निगमया कार्यकारी अध्यक्ष सुगतरत्न कंसाकार नापं मेपिं खुम्ह पदाधिकारीतय्त एअरबस न्यायेत दां बैना बिउगु भ्रष्टाचार जुल धासें मुद्दा तयेगु निर्णय याःगु खः।
थ्व मुद्दां यानाः आः निगमं विमान न्यायेगु ज्या ठप्प हे जूवंगु दु। आः मुद्दा क्वमचाःतले विमान न्यायेगु ज्या मन्ह्याइगु हे जूवंगु दु ।
अख्तियारपाखें थ्व मुद्दा तयेगु खँ वयेवं कार्यकारी अध्यक्ष कंसाकार नापं खुम्हं पदाधिकारीत थौं ज्याकुथी मवःगु खँ निगम सूत्रं धाःगु दु। थज्याःगु मुद्दा लात कि वय्कःपिं स्वतः निलम्बन जूगु ठहर जुइ ।
तर निगम सूत्रं धाः कथं अख्तियारं तःगु थ्व मुद्दा अतिकं कमजोर मुद्दा खः। थ्व खास यानाः जहाज न्याके मबीगु लागिं जक तःगु सीदु। निगमं एअरबस कम्पनीयात बिउगु न्यागू करोड दां लित हे मवइगु मखु। उगु सम्झौता डिसेम्बर ३१ तक कायम दनिगु जुयाः माल धाःसा थ्व ध्यबा लिहां वइतिनि, लिहां वइगु ध्यबायात भ्रष्टाचार धाये मछिंगु खँ धाःगु दु ।
