नेविसंघपाखें चक्काजाम
येँ (सन्ध्या टाइम्स)/नेपाल विद्यार्थी संघया कार्यकर्तातय्सं थौं सुथय् येँया थीथी क्याम्पस न्ह्यःने ९ बजेनिसें १० बजे तक चक्काजाम यात। थःपिनिगु संगठनया कार्यकर्तायात त्वःतेमाःगु माग यानाः थथे चक्काजाम याःगु इलय् शंकरदेव व त्रिचन्द्र कलेजय् प्रहरी व प्रदर्शनकारीतय् दथुइ अप्पां कयेकाः ल्वापु जूगु खः ।
घौछि तक चक्काजाम याःगुलिं सुथंनिसें हे यातायात संचालनय् पंगः ब्वलंगु दु। छुं दिं न्ह्यः त्रिचन्द्र कलेजय् अखिलया विरेन्द्र रावलयात खुकुरीं पाःगु द्वपं बियाः नेविसंघया संजय यादवयात ज्वनातःगु खःसा वय्कःयात त्वःतेमाल धकाः माग यानाः थौं नेविसघं चक्काजाम याःगु खः ।
