'कुर्सी दाउलय् तयेत तयार दु, तर जनताया सर्वोच्चता मदु'
माओवादीया वरिष्ठ नेता व अर्थमन्त्री डा. बाबुराम भट्टराईं सरकारं प्रधानसेनापतियात कारवाही याना: हे त्वतिगु खँ धयादीगु दु । वयेकलं सहमति मजूसाः सरकार नं त्वते तयार दु, तर जनताया सर्वोच्चता कायम यानाः तुं त्वतेगु खँ धयादिल । वयेकलं धयादिल, - 'कुर्सी दाउलय् तयेत माओवाद तयार दु, तर जनताया सर्वोच्चता दाउलय् तये तयार मदु ।' वयेकलं माओवादीं आदर्श त्वताः सत्ताय् च्वनीमखु धयादिल ।
सच्छि व नीक्वःगु मे दिवसया लसताय् येँय माओवादी भातृ संगठन अखिल नेपाल टे्र्ड युनियन महासघं (क्रान्तिकारीं) याःगु ज्याझ्वलय् न्ववासें माओवादी वरिष्ठ नेता डा. भट्टराईं राष्ट्रपतियात सुयां दबावय् वया पलाः मल्ह्वनेत चेतावनी बियादिल । राष्ट्रपतियात संवैधानिक अधिकार जक ब्यूगुलिं दबावय् वयाः छुं नं कथंया पलाः ल्ह्वंसाः ज्ञानेन्द्रया हालतय् थ्यंकाबीगु चेतावनी बियादीगु खः । छुं मनूतय्सं व पार्टीतय्सं राष्ट्रपतियात माओवादीं देय् स्यंकेत स्वःगु धासें पलाः ल्ह्वनेत इनाप यानाच्वंगु द्वपं बियादिल ।
माओवादी सरकारयात थाकूगु थासय् लाकूगु धासें गबलें एमाले व गबलें कांग्रेसया लुखाय् वना सहमतिया निंतिं वंसां सहमति यायेत माने मजूगु द्वपं ब्यूसें वयेकलं माओवादीं आः यक्वः धैर्य मयाइगु चेतावनी बियादिल ।
सेनाया बः कयाः १७ सालय् तत्कालीन जुजु महेन्द्र व माघ १९य् तत्कालीन जुजु ज्ञानेन्द्रं प्रजातन्त्रय् आक्रमण याःगु धयादिल । नापं वयेकलं सेनायात लोकतान्त्रिक देयेके मफुगुलिं थौंया अवस्था वःगु धयादिल । कांग्रेस संस्थापक नेता बीपिं नं सेनायात लोकतान्त्रिक यायेत स्वःगु तर बिचाः याये कथं देयेके मफूगु धासें अर्थमन्त्री डा. भट्टराईं अझ नं कांग्रेसं थ्व बारे बीचाः यायेमफूगु धयादिल ।
