'अनमिनया म्याद थपे मयाःसा दुर्घटना'
येँ (सन्ध्या टाइम्स)/ एनेकपा (माओवादी)या उपाध्यक्ष मोहन वैद्य (किरणं) यदि अनमिनया म्याद थपे मयात धाःसा देशय् तःधंगु दुर्घटना जुइगु ख्याच्वः बियादीगु दु।
म्हिगः थन पत्रकारतलिसे खँल्हाबल्हा यासें उपाध्यक्ष वैद्यं गुगु उद्देश्यया लागिं अनमिन सःतागु खः, व उद्देश्य अझं पूरा मजूनिगु कारणं अनमिनया म्याद थपे यायेगु बाहेक मेगु छुं हे विकल्प मदुगु दावी नं यानादिल ।
वय्कलं धयादिल, 'अनमिनया म्याद थपे मयात धाःसा मुलुकय् आपालं हे गडबडी शुरु जुइ ।'
वय्कलं माओवादीं सरकार गठनया कुतः त्याग मयाःनिगु दावी नं यानादिल। सरकार गठन यायेत थःपिं अझ नं क्रियाशील जुयाच्वनागु खँ कँसें वय्कलं धयादिल, 'जिमिसं सरकार दयेके मफुसा मेगु दलयात समर्थन यायेगु जुइ। व नं मजुल धाःसा प्रतिपक्षीइ च्वनेत नं जिपिं तयार दु ।'
