पलेस्वां दँपौ खुगूगु ल्याः पिदन
येँ (सन्ध्या टाइम्स)/पद्मकन्या क्याम्पस पलेस्वां साहित्य पुचःया साहित्यिक दँपौ 'पलेस्वां' खुगूगु ल्याः वंगु शुक्रवाः जूगु छगू ज्याझ्वःया दथुइ मूपाहां नेपालभाषा मिसा खलःया पुलांम्ह नकिं लिसें साहित्यकारसुवर्णकेशरी चित्रकारं पित ब्वज्या यानादिल ।
पद्मकन्या क्याम्पस नेपालभाषा शिक्षण समिति व पलेस्वां साहित्य पुचःया ग्वसालय् डेनिस हलय् जूगु ज्याझ्वलय् मूपाहां चित्रकारं क्याम्पसय् नेपालभाषा विषयय् दकलय् अप्वः ल्याः हयादीपिं विद्यार्थीतय्त सिरपाः व छात्रवृत्ति नं लःल्हाःगु खः ।
सिरपां कथं ने.सं. ११३१ य् बि.ए. तगिंमय् दकलय् अप्वः ल्याः हयादीपिं जसना राजभण्डारी व विमला नेपालीयात निद्वः तकाया सिद्धि सिरपाः व ने.सं. ११३०या बी.ए. तगिंमय् अप्वः ल्याः हयादीपिं शर्मिला सुवाल व रविना तुलाधरयात झिंन्यासः तकाया ज्ञानज्योति सिरपाः लःल्हाःगु खः ।
लिसें नेपालभाषा विषयय् कयाः ब्वनाच्वंपिं झिंछम्ह विद्यार्थीतय्त छात्रवृत्ति नं लःल्हाःगु खः। ज्याझ्वलय् नेपालभाषा केन्द्रीय विभागया प्रमुख प्रेम शान्ति तुलाधर, रीना तुलाधर व पलेस्वां दँपौया सम्पादक शर्मिला सुवालपिंसं नं थःथःगु नुगःखँ तयादीगु खः। पद्म कन्या क्याम्पस नेपालभाषा शिक्षण समितिया प्रमुख प्रेमहीरा तुलाधरया सभापतित्वय् जूगु ज्याझ्वलय् सह-प्राध्यापक मदन 'सेन' वज्राचार्यं लसकुस यानादीगु खः ।
