नेवाः नसा दयेकेगु तालिम

उदयपुरय् च्वंपिं नेवाः ल्याय्म्ह ल्यासेत थौंकन्हय् लय्ताः, कारण आः थःगु थासय् थःपिंसं हे नेवाः नसा दयेकाः नयेत उपिं सक्षम जुया वःगु दु ।

वंगु वालंनिसें उदयपुरय् च्वंपिं नेवाः ल्याय्म्ह ल्यासेतय्त नेवाः नसात्वँसा दयेकेगु तालिम शुरु याःगु जुयाच्वन। तालिम मुक्कं छवाःया जक खः। थ्व छवाःया दुने उमिसं चतांमरि, वः लिसें लायागु थीथी परिकार दयेके सयेके धुंकूगु दु। लायागु परिकार धायेबलय् नं खास यानाः छ्वय्ला, कचिला, दायेकाला, पुकाला आदि आदि जक।
परिकार दयेकावं वंलिसे धकाःसा उमिसं सिल, नेवाःतय् लायागु परिकार जक हे चय्प्यता दुगु जुयाच्वन। आः उगु परिकार नं दयेके सयेकेगु लागिं तालिम अवधि भचा बढे यायेमाली धइगु माग उमिसं याना हयाच्वंगु दु ।

उगु परिकार दयेके स्यनेगु लागिं स्वनिगःपाखें मध्यपुर कला परिषद्या प्रशिक्षकपिं इश्वरी प्रजापति, विद्या प्रजापति व राम प्रजापतिं उखे झाःगु खः। वय्कःपिंसं वंगु पुस ६ गते प्रशिक्षणया उलेज्या यासें तालिम न्ह्याकूगु खः।
तालिमय् स्थानीय ३२ म्ह ल्याय्म्ह ल्यासेतय्सं ब्वति कयाच्वंगु दु। न्हिंन्हिं वइ, नसा दयेकेगु स्यनी, दयेकूगु नसा अन हे नइ अले लिहां वनाः हानं छेँय् दयेकाः छेँय् च्वंपिंत नकी। उमिगु थौंकन्हय्या दिनचर्या थथे जुयाच्वंगु दु ।

गय् च्वं ले नेवाः नसा दयेकेगु थ्व तामिल? थज्याःगु न्ह्यसः तयाबलय् उगु तालिमया संयोजक जुयाच्वंम्ह भाजु कृष्ण श्रेष्ठं धयादी, 'थःपिनिगु नसात्वँसा प्रत्यक्ष दयेकाः नये खंगुलिं तसकं लय्ताः। न्हापा न्हापा येँपाखे वयेबलय् जक नये खनीगु नेवाः नसा आः थःपिंसं हे दयेके सयाः तसकं न्ह्यइपुसे च्वनाच्वंगु दु ।'

अथे हे मेम्ह सहभागी कल्पना श्रेष्ठयात नं नेवाः नसा दयेके सयाः तःधंगु हे रोमांचकारी अनुभूति जुयाच्वंगु दु। कल्पना थीथी कथंया नसा दयेकेसः तर नेवाः नसा हे दयेके मसयाच्वंगु, आः दयेके सल। धयादी, 'नेवाः जुयाः नेवाः नसा हे दयेके सयाः गौरवया अनुभूति जुयाच्वंगु दु।'
अथे हे मेम्ह सहभागी दिपेन्द्र श्रेष्ठया अनुभव नं अज्याःगु हे दु। उदयपुर थेंज्याःगु तापाःगु थासय् च्वनाः नं नेवाः नसा दयेकाः नये फइगु जुयाः वय्कः उत्साहित जुयाच्वंगु दु। तर नसा दयेकेगु थ्व तालिम अवधि धाःसा अझ भचा थपे यायेमाःगु वय्कःया बिचाः दु ।

थीथी मौसमय् नेवाःतय्सं मौसमयात ल्वयेक थीथी हे कथंया नसात्वँसा नयेगु याइ धइगु खँ न्यनाः सहभागीत अझ अजू चायाच्वंगु दु। उकिया नमूना क्यने कथं उकुन्हु यःमरि पुन्हि कुन्हु वय्कःयात यःमरि हे दयेकेगु तालिम बिल। न्हापांखुसी थःपिनिगु हे ल्हातिं छुनागु यःमरि नये खनाः वय्कःपिं तसकं लय्ताः। उगु इलय् यःमरि जक मखु उकिया पौष्टिक व सांस्कृतिक महत्व समेत कनेगु ज्या जूगु खः ।

ज्याझ्वः उदयपुरया नेवाःतय्गु संस्था झीगु नेवाः पुचःया ग्वसालय् जूगु खः। थज्याःगु तालिमपाखें छेँय् छेँय् नेवाः दयेकाः नयेत्वने याइगु जक मखु, स्थानीय रुपं नेवाः नसाया होटल रेष्टुराँ चायेकाः व्यवसाय समेत याये फइगु आशा नं ग्वसाः खलकं याःगु दु। थौंकन्हय् थीथी थासय् नेवाः नसाया रेष्टुराँत चालाच्वंगु अवस्थाय् उदयपुरय् नं थ्व सम्भावना दयेफुगु खँ धाःगु दु ।