सत्ता साझेदार दलतय् निर्णय सहमति विपरित : माओवादी
सत्ता साझेदार दलतय्सं प्याकेजय् सहमति जुइधुंकाः जक नियमति अधिवेशन सःतेमाःगु निर्णय याःगुयात एकीकृत नेकपा (माओवादीं) सहमति विपरित जूगु ठहर याःगु दु ।
आइतवाः सुथय् माओवादी नायः पुष्पकमल दाहाल 'प्रचण्ड'या न्हू बजारय् च्वंगु स्थायी समितिया मुँज्यां सरकार व सत्तारुढ दलं स्वंगू दल दथुइ तत्काल नियमित अधिवेशन सःतेगु सहमतियात वेवास्ता याःगु धासें शान्ति व संविधानयात अलपत्र यायेगु स्वःगु द्वपं ब्यूगु दु ।
'स्वंगू दल दथुइ तत्काल नियमित अधिवेशन सःतेगु सहमति जूगु खः' मुँज्या लिपा माओवादी प्रवक्ता दिनानाथ शर्मां धयादिल 'आः सत्ता साझेदार दलतय्सं उकीया अःखा थीथी खँय् सहमति जुइधुंकाः जक अधिवेशन सःतेगु निर्णय यानाः सहमितया वेवास्ता यात ।'
शर्मां थौं हे च्वनीगु स्वंगू दलया शीर्ष नेतातय् मुँज्याय् थुकीया बारे माओवादीं खँ तयेगु जानकारी बियादिल ।
म्हिग च्वंगु सत्ता साझेदार दलतय् मुँज्यां लडाकु समायोजन, संविधान निर्माण व सत्ता समिकरण लगायताया विषयलय् प्याकेजय् सहमति जुइधुंकाः जक नियमित अधिवेशन यायेमाःगु खँ धाःगु खः ।
