थनिंनिसें एमआरपी इनेगु शुरु
सरकारं थनिंनिसें मेशिन रिडेवल पासपोट (एमआरपी) इनेगु ज्या शुरु याःगु दु । परराष्ट्र मन्त्री सुजाता कोइरालां प्रधानमन्त्री माधवकुमार नेपालयात पासपोर्ट लःल्हानाः इनेगु ज्या न्ह्याकादीगु खः । प्रधानमन्त्री निवास बालुवाटारय् थौं याःगु छगू विशेष ज्याझ्वलय् मन्त्री कोइरालां एमआरपी लःल्हानादीगु खः ।
न्हापांगु चरणय् एमआरपी प्रधानमन्त्री नापं संवैधानिक अंगया प्रमुखत सभामुख सुभाषचन्द्र नेम्वाङ व प्रधानन्यायाधीश रामप्रसाद श्रेष्ठयात लःल्हाःगु खः । राष्ट्रपति डा. रामवरण यादव व उपराष्ट्रपति परमानन्द झायात धाःसा वय्कःपिनि हे छेँय् वनाः लःल्हाइगु जूगु दु ।
उखे सर्वसाधारण पाखे धाःसा सिएनएन हिरो २०१० त्याकेत ताःलानादीम्ह माइति नेपालया नकिं अनुराधा कोइरालयात प्रधानमन्त्री नेपाल एमआरपी लःल्हानादीगु खः । प्रधानमन्त्री नेपालं वय्कःयात पासपोर्ट लःल्हायेवं सर्वसाधारणतय् निंतिं नं एमआरपी इनेगु ज्या सुरु जूगु दु ।
