सहमतिया अधारय् कारवाही यायेमाः : फोरम

सत्तारुढ मधेशी जनअधिकार फोरमं प्रधानसेनापति रुक्मांग कटवालयात कारवाही यायेगु खँय् सहमति यानाः जक न्ह्या वनेमाःगु निर्णय याःगु दु ।

शुक्रवाः सिंहदरवारय् फोरमया संसदीय दलया बैठकं दक्व दलत नाप सहमति यानाः जक कारवाही यायेमाःगु निर्णय याःगु दु । छगू दलं मेगू दलयात द्वपं बीगू ज्यां यानाः देय् दुर्घटनाय् लायेफूगु धासें सहमतिया आधारय् न्ह्यावनेमाःगु निष्कर्ष पिकयादीगु दु ।

बैठकय् अधिकासं शिर्षस्थ नेतातय्सं कारवाही यायेमज्यूगु पक्ष न्ववा:गु खः । अध्यक्ष उपेन्द्र यादव पक्षया नेतातय्सं प्रधानसेनापतियात कारवाही यायेमाःगु बिचाः प्वंकूगु खसाः संसदीय दलया नेता विजयकुमार गछेदार पक्षं प्रधानसेनापतिया कारवाही यायेमज्यू बिचाः प्वंकूगु खः ।