असमझदारीया कारणं देय् संकटपाखे : नायः खनाल
नेकपा एमालेया नायः झलनाथ खनालं शान्ति व संविधानया खँय् ठोस योजना सार्वजनिक याःसा एकिकृत नेकपा माओवादीया नेतृत्व स्वीकार यायेफइगु खँ धयादीगु दु ।
पर्वत-येँ सम्पर्क मंचं थौं येँय् ग्वसाः ग्वःगु ज्याझ्वलय् न्ववानादिसें दलत दथुइ दयाच्वंगु असमझदारीया कारणं देय् संकटपाखे वनाच्वंगु खँय् चिन्ता प्वंकादिल । नायः खनालं देशय् न्ह्यानाच्वंगु राजनैतिक गतिरोध न्हंका छ्वयेगु व देय्यात संकटपाखें बचे यायेत नं दलतय् दथुइ सहमति जुइमाःगु खँय् बः बियादिल ।
प्रधानमन्त्री ल्यये मफूगुलिं देशय् अर्थतन्त्र धरासायी जूगु वयकःया धापू दु । वय्कलं धयादिल "थवं थवय् दयाच्वंगु असमझदारीयात त्वःताः दलत सहमती वयेमाः ।"
उखे नेकपा एमालेया नेता नापं सूचना तथा संचार मन्त्री शंकर पोखरेलं धाःसा माओवादी विद्रोही शक्ति जूगुलिं सरकारय् वनेगु म्हगस खंकेगु त्वःतेत इनाप यानादिल ।
सरकारया प्रवक्ता तकं जुयादीम्ह मन्त्री पोखरेलं थौं ख्वपय् जूगु ज्याझ्वलय् न्ववानादिसें शान्ति प्रकृया एकिकृत नेकपा माओवादीया कारणं लिज्यानाच्वंगु तकं द्वपं बियादिल । वय्कलं शान्ति थौंया मू आवश्यकता जूगु खँ धयादिसें शान्ति प्रकृया निष्कर्षय् थ्यंकेत दक्व दलत छप्पँ जुयाः वनेमाःगु बिचाः प्वंकादिल ।
