रियल प्रकरणय् बाराया प्रजिअ नं छानबिनया दायराय्
बाराया रामपुर स्थित डाबर नेपालया उत्पादन रियल जुसबारे वंगु बुधवाः निसें अनुसन्धान यानाच्वंगु अख्तियार दुरुपयोग अनुसन्धान आयोगं बाराया प्रमुख जिल्ला अधिकारीयात नं छानविनया दायराय् लाकूगु दु ।
अख्तियारं बाराया प्रजिअ बसन्तप्रसाद उपाध्याययात न्यनेकनेया निंतिं शुक्रवाः पौ च्वःगु खः । स्थानीय प्रशासकया रुपय् प्रजिअ उपाध्यायं थःगु क्षेत्र दुनेया उद्योगयात कारवाही प्रक्रिया न्ह्याकेफुगु जुसां रियल जुसया सम्बन्धय् अथे मयाःगुलिं वय्कःयात नं न्यनेकने यायेत्यंगु खः ।
थ्वहे दथुइ रियल जुस त्वनाः बिरामी जुम्ह काभ्रेया शारदा बतासेया स्वास्थ्य अवस्था अझ सुधार मजुनीगु खँ धाःगु दु । भ्वतया शिर मेमोरियल अस्पतालय् वासः जुयाच्वंम्ह न्याम्ह मध्ये बतासेया अवस्था चिन्ताजनक जूगु धाःगु दु ।
अथेहे मेम्ह वासः जुयाच्वम्ह १२दँया स्मृति हुमागाईंयात म्हिग डिस्चार्ज याःसां छुं ई लिपा हे हानं बेहोस जुइवं उगु हे अस्पताल भर्ना याःगु दु । अस्पताल स्रोतया कथं हुमागाईंया म्हय् अझ नं विषादी दनीगु खँ धाःगु दु ।
