'ल्वाभः त्याग यायेधुंकाः जक शान्ति प्रक्रिया पूवनी'
प्रधानमन्त्री माधवकुमार नेपलां माओवादीं ल्वाभः त्याग यायेधुंकाः जक शान्ति प्रक्रिया पूवनीगु खँ धयादीगु दु ।
एमालेया नारायणी अञ्चल स्तरीय कार्यकर्ता भेलाया थौं येँय् उलेज्या यानादिसें प्रधानमन्त्री नेपालं माओवादी लडाकुया समायोजन व पुनःस्थापना, क्यान्टोनमेन्ट खाली, वाईसीएलया अर्ध सैन्य संरचना भंग व ल्वाभः मोह त्याग यायेधुंकाः जक शान्ति प्रक्रिया पूर्ण रुपं क्वचाइगु धयादिल ।
वय्कलं लडाकु समायोजन व पुनःस्थापनाया निंतिं गठन जूगु सेना समायोजन समिति हे पर्याप्त जूगु धासें अनमिनया म्याद हानं तनाच्वने म्वाःगु धयादिल । वय्कलं अनमिनया म्याद थप यायेत सुं नं लगे मजुत इनाप यासें झीगु समस्या समाधान यायेत झी हे सक्षम जूगु धयादिल ।
उखे थौं हे एमाले क्षेत्रिय कमिटी १ व २ ख्वपं याःगु ज्याझ्वलय् संचार मन्त्री शंकर पोखरेलं माओवादी अझ नं विद्रोही शक्ति जूगु धयादिल । वय्कलं विद्रोही पक्षं सरकार नेतृत्व यायेमफइगु धासें न्हूगु संविधान न्ह्यः माओवादी नेतृत्वया सरकार असम्भव जूगु धयादिल ।
