सरकार ल्यूने सरे जुइमखु : महरा

सूचना व संचारमन्त्री कृष्णबहादुर महरां प्रधानसेनापतियात कारवाही याइगु विषयलय् सरकार ल्यूने सरे मजूइगु खँ धयादीगु दु ।

मे दिवसया लसताय् अखिल नेपाल ट्रेड युनियन महासंघ भेरी-कणर्ली राज्य समितिपाखें वीरेन्द्रनगरय् शुक्रवाः याःगु मजदुर सभाय् न्वासें वयेकलं धयादिल - 'थपिं दनाच्वंगु थासय् बलिदान बीत तयार दु तर क्वछुइत तयार मदु ।' वयेकलं प्रधानसेनापतियात कारवाही यायेगु खँ जनयुद्ध ल्वयेगु स्वयां थाकूगु ज्या जूगु खँ धयादिल ।

वयेकलं सेनापति विवादया झ्वलय् विदेशी हस्तक्षेप अप्वःगु धासें भारतीय राजदुत राकेश सूद नेतातय् छेँ छेँ वनाः राष्ट्रियताय् षडयन्त्र यानाच्वंगु धयादिल ।