बस दुर्घटनाय् न्याम्ह मंत
येँ (सन्ध्या टाइम्स)/पाल्पाय् छगः यात्रुवाहक बस दुर्घटना जुयाः न्याम्ह यात्रु सीगु दु। लिसें मेपिं स्वम्ह बांमलाक घाःपाः जूगु दु। बुटवलं गुल्मीपाखे वनाच्वंगु लु. १ च ३६६६ नम्बरया बस लँय् तुं दुर्घटना जूगु खः ।
पाल्पाया मस्याङ गाविसया केरावारी लागाय् थौं सुथय् साढे ५ बजे उगु दुर्घटना जूगु खः। सीपिं न्याम्ह यात्रुत घटनास्थलय् हे मदुगु खः। तर न्याम्हेसियां सनाखत धाःसा मजूनिगु खँ प्रहरीं धाःगु दु ।
उगु दुर्घटनाय् लानाः रुपन्देहीया कमला अर्याल व आरती खनाल नापं मेम्ह छम्ह घाःपाः जूगु खः। घाःपाः जूपिं निम्हेसित बुटवलय् वासः यायेगु ज्या जुयाच्वंगु दुसा मेम्ह छम्हेसित पाल्पाय् हे वासः याकातःगु दु। उगु बस दुर्घटनाया कयाः स्थानीय प्रहरीं अनुसन्धान यानाच्वंगु दु ।
