ट्याक्सीडर्मी तालिम

येँ (सन्ध्या टाइम्स)/त्रि.वि. प्राकृतिक विज्ञान संग्रहालयं विश्व वन्यजन्तु कोष, नेपाल कार्यक्रमया ग्वाहालिइ वंगु मंसीर २९ गतेनिसें पौष १ गते तक निन्हुया ट्याक्सीडर्मी तालिम ज्याकूया उलेज्या जुल ।

त्रिवि प्राकृतिक विज्ञान संग्रहालय वंगु २१ दँ न्ह्यवंनिसें साइटिस (दुर्लभ वन्यजन्तुया अंगया व्यापार प्रतिबन्ध सम्बन्धी सन्धी) या प्राणी विधाय् वैज्ञानिक निकायया रुपय् ज्या यानाच्वंगु दु। विश्व वन्यजन्तु कोष नेपाल कार्यक्रमया ग्वाहालिइ न्ह्यानाच्वंगु ज्याझ्वः कथं वंगु ०६७ या आषाढय् थीथी विद्यालयया विद्यार्थीतय्त साइटिस सम्बन्धी चेतना ब्वलंकेगु ल्याखं शैक्षिक कार्यक्रम न्ह्याकूगु खः। थ्व झ्वलय् मंसीर २ निसें पौष १ गते तक ट्याक्सीडर्मी तालिम याःगु खः। उगु ज्याझ्वलय् संग्रहालयया प्रमुख प्रा.डा. केशव श्रेष्ठं लसकुस यासें प्राकृतिक विज्ञान संग्रहालयया म्हसीका बियादिल। वय्कलं थ्व संग्रहालयं जैविक विविधता संरक्षणया ज्याय् मू भूमिका म्हिता वयाच्वंगु व लोप जुइत्यंगु महत्वपूर्ण वन्यजन्तुतय्गु नमूनात लोप जुइ न्ह्यः हे अध्ययन अनुसन्धानया लागिं संरक्षण यायेगु थुकिया उद्देश्य खः। वय्कलं कनादी कथं नमुना संरक्षण यायेगु थीथी वैज्ञानिक पद्धति मध्ये ट्याक्सीडर्मी नं छगू खः ।

नेपाल वन्यजन्तु संरक्षण ऐनं छुं छुं वन्यजन्तुतय्त चोरीशिकारी, बिक्री वितरण, व्यापार व घरपालुवाया रुपय् प्रयोग यायेत रोक लगे यानातःगु जूगुलिं अज्याःपिं वन्यजन्तुत सिनाच्वंगु लुया वल धाःसा सम्बन्धित थासय् खबर यानाः संरक्षण यायेमाःगु बिचाः नं वय्कलं प्वंकादिल। प्राकृतिक रुपं सीपिं जनावर नं राष्ट्रिय सम्पदा व संरक्षणया लागि वैज्ञानिक सामग्री जुइ फइ धइगु ज्ञान बीत उगु ज्याझ्वः याःगु खः। ज्याझ्वलय् थीथी जिल्ला वन कार्यालय, त्रि.वि. प्राणीशास्त्र केन्द्रीय विभाग व मेमेगु सम्बन्धित संघ संस्थाया १५ म्ह मनूतय्गु सहभागिता दुगु खः। ज्याझ्वलय् ट्याक्सीडर्मी सम्बन्धी तालिमया लागि येँया वन कार्यालयं बरामद यानातःगु इमा व खाया नमूनात प्रयोग याःगु खः ।

सीपिं पंक्षी व जनावरतय्त ट्याक्सीडर्मी प्रकृयापाखें संरक्षण यायेफःसा सलंसःदँ तक मेगु पुस्ताया लागि संग्रहालय, अनुसन्धान केन्द्र, शैक्षिक संस्था, निकुञ्ज आदि थासय् सुरक्षित यानाः तये फइगु जूगुलिं थज्याःगु तालिमयात नियमित व व्यापक यायेमाःगु खँय् नं ज्याझ्वलय् सहलह जूगु खः। सीपिं पंक्षी व वन्यजन्तुया म्हया दुने च्वंगु ब्व फुक्कं लिकयाः उकिया दुने मेगु हे ध्वमगीगु ज्वलंत तयाः हानं म्वाःम्ह हे जीवजन्तु थेंच्वंगु आकार पिकायेगु ज्यायात ट्याक्सीडर्मी धाइ ।